Byłoha supracoŭnika FSB Rasii, pałkoŭnika ŭ adstaŭcy, abvinavacili ŭ pahrozie ździajśnieńnia teraktu ŭ aeraporcie Minska, paviedamlaje rasijski telekanał «Łajfńjus».
Jon zajaviŭ, što jaho źbivali i vymusili pryznacca ŭ pahrozach rabotnikam aeraporta. Jak śćviardžaje były rasijski aficer śpiecsłužbaŭ, jon prybyŭ na terytoryju Biełarusi z synam na pachavańnie maci.
Jon śćviardžaje, što ŭ punkcie nadhladu jamu prapanavali razucca i nadzieć bachiły. «Na heta ja paprasiŭ nie stavicca da mianie praduziata i dadaŭ, što sam były vajskoviec. Mianie z synam adrazu adviali ŭ admysłovy pakoj, adkul dastavili ŭ prakuraturu», — śćviardžaje rasijanin.
Pa słovach rasijanina, jaho źbivali, pahražali zatrymańniem syna, paśla čaho jon pryniaŭ rašeńnie pahadzicca z abvinavačvańniem i pryznać vinu.
«Ja vyrašyŭ, što budučy na svabodzie zmahu chutčej vyrašyć hetaje pytańnie, i padpisaŭ dakumienty. Pad vartaj ja znachodziŭsia 10 dzion, — piša jon. — Za hety čas moj syn źlataŭ u Maskvu i sabraŭ patrebnuju dla hrašovaj zastavy sumu», — śćviardžaje rasijanin.
Jon śćviardžaje, što zastava skłała ekvivalent 5000 dalaraŭ. Były supracoŭnik śpiecsłužbaŭ śćviardžaje, što jon źbieh u Rasieju praz adkrytuju miažu, bo bajaŭsia jechać ciahnikom ci samalotam.
Rasijanin zajaŭlaje, što jaho ŭ Minsku abvinavacili ŭ pahrozie teraktu i što padčas słužby jon pracavaŭ jakraz u adździele pa supraćdziejańni ekstremizmu i teraryzmu.
Jak patłumačyli «Našaj Nivie» ŭ Ministerstvie ŭnutranych spraŭ, dadzieny hramadzianin niaŭdała pažartavaŭ u punkcie nadhladu, što ŭ jaho jość bomba. Adpaviednyja słužby zreahavali na takuju zajavu zhodna sa słužbovymi instrukcyjami. Pad vartu žartaŭnika-«pałkoŭnika» nie źmiaščali. Kastryčnicki rajadździeł Śledčaha kamiteta pravodzić pravierku pa hetaj spravie.
Na pytańnie, ci zatrymany źjaŭlajecca pałkoŭnikam FSB, nam adkazali, što «nijakija pałkoŭniki FSB abo hramadzianie Rasijskaj Fiederacyi ŭ aeraporcie nie zatrymlivalisia».
Ahułam sprava mieła miesca paŭtara miesiaca tamu.
Materyjał ža «Łajfńjusa» naša krynica nazvała tym, «pra što niama čaho razmaŭlać, navat kamientavać nie źbirajemsia».
