Aleh Trusaŭ.
Padčas refierendumu 1995 hoda, kali ŭ krainie było pryniataje dvuchmoŭje, Aleha Trusava chacieli zabić. Pra heta jamu potym raspaviała jaho kamanda. Niejki čałaviek chadziŭ ź siakieraj, vyšukvaŭ Trusava i paŭtaraŭ: «Ja pryjšoŭ jaho zabić».
«Ale pakolki ja syšoŭ, to i zabivać nie było kaho», — raspaviadaje Aleh Anatoljevič.
Tak što ničoha strašnaha nie adbyłosia.
Aleh Trusaŭ — kandydat u deputaty Pałaty pradstaŭnikoŭ pa Čkałaŭskaj vybarčaj akruzie № 96. Da vybaraŭ zastajecca zusim mała času, i, jak pryznajecca staršynia Tavarystva biełaruskaj movy, choć mocna stamiŭsia, zatoje pamaładzieŭ hadoŭ na 20.
«Ja tolki pryjšoŭ z vybarčaj akruhi i prosta ŭ zachapleńni ad padtrymki ludziej! — uzrušana raspaviadaje spadar Aleh. — Ludzi, jakija raniej byli suprać, ciapier usie «za». I studenty, i piensijaniery padzialajuć maju prahramu i abiacajuć, što pojduć na vybary 11 vieraśnia i pryviaduć hałasavać za mianie ŭsich, kaho viedajuć. Plus ludzi nadzvyčaj dobra staviacca da majoj biełaruskamoŭnaj kampanii, zachaplajucca tym, što mova nie pamierła. Ludzi ŭžo nie bajacca havaryć, jak kaliści «movu» ź ich vybivali».
Aleh Anatoljevič pazityŭna stavicca da taho, što demakraty ad roznych partyj udzielničajuć u vybarach i stvarajuć pamiž saboj kankurencyju.
«Adnak značnaja častka apazicyi vielmi słabaja. Jany nie ŭjaŭlajuć, kudy iduć, i staviacca da vybaraŭ vielmi niesurjozna. Zrabi zaŭtra supierdemakratyčnyja vybary, jany z treskam prajhrajuć, bo nie ŭmiejuć pracavać, bajacca ludziej i nie razumiejuć, što takoje zakanadaŭčaja tvorčaść», — dadaje Trusaŭ.
U svajoj pieramozie jon upeŭnieny.
«Ja dumaju, vielmi dobra, što pajšoŭ u hetuju kampaniju, ja baču, što padtrymka ŭłady blizkaja da nula. Adčuvaju, što pieramoh, a kolki hałasoŭ mnie napišuć — heta mianie mała cikavić», — adznačyŭ kandydat.
