Reuters.com
Mižnarodnaja ekśpiertna-žurnalisckaja hrupa Bellingcat vyjaviła novuju fatahrafiju ZRK «Buk» 332, što jak miarkujecca, źbiŭ małajzijski Boeing nad Danbasam u 2014 hodzie. Fota paćviardžaje, što mašyna była prypisanaja da rasijskaj 53-j zienitna-rakietnaj bryhady (vajskovaja čaść 32406). Heta apošni viadomy fotazdymak «Buka» pierad pieradysłakacyjaj ZRK z Rasii va Ukrainu. Zdymak zrobleny ŭ 2013 hodzie, adnak trapiŭ u sietku tolki ŭ lutym 2015 hoda, adznačajuć śledčyja ŭ svaim dakładzie.
Na fota mužčyna na fonie ZRK «Buk» 332, zzadu — ružovy kantejnier dla pieravozki rakiety 3M8 ZRK «Koła». Jak vyśvietliŭ RBK, čałaviek na zdymku zajmajecca ramontam vajskovaj techniki, u pryvatnaści, jon ramantavaŭ BUK-1M. Miechanik (jaho imia viadoma redakcyi) rastłumačyŭ RBK, što byŭ u mnohich haradach Rasii ŭ siłu śpiecyfiki svajoj pracy. Jon paćvierdziŭ, što «dakładna byŭ» u Kursku ŭ 2013 hodzie i «mahčyma» ŭ 2014 hodzie. Pra toje, što «Buk» na fota toj samy, jaki, pa śćviardžeńni Bellingcat, źbiŭ małajzijski Boeing, śviedčać biełyja ličby numara, adznaki habarytu pahruzki i transpartnyja marki. «Jany znachodziacca ŭ tym ža miescy, što i na fotazdymkach i videa «Buka» 332, kali jon byŭ u Rasii ŭ červieni 2014 hoda i va Ukrainie ŭ lipieni 2014 hoda», - padkreślivajuć aŭtary dakłada.
Fatahrafija ź miechanikam była zroblena na transpartnym dvary 53-j bryhady, adznačajecca ŭ dakładzie
Paćviardžaje heta inšy zdymak, apublikavany nienazvanym kursantam ŭ žniŭni 2014 hoda (imia kursanta aŭtary dakładu nie pakazvajuć, viadoma tolki, što jon prachodziŭ zbory ŭ Kursku pa nakiravańni adnaho z maskoŭskich VNU). Na zdymku druhoha kursanta adlustravany toj ža ružovy rakietny kantejnier i Buk 332. Hieateh paćviardžaje, što fota zroblena ŭ dvary 53-j bryhady ŭ pasiołku Maršała Žukava, niedaloka ad Kurska. Hieałakacyju fatahrafii aŭtaram dakładu ŭdałosia paćvierdzić dziakujučy spadarožnikavym zdymkam.
