Ich baćki — viadomyja i zaŭvažnyja ŭ krainie ludzi, jakija dekłarujuć niepadzielnaść svajho losu z budučyniaj Biełarusi: heta nie tolki palityki, ale i hramadskija dziejačy, pravaabaroncy. Ale dzie žyvuć i čym zajmajucca ich dzieci?
«Naša Niva» daviedałasia — my skłali admysłovy śpis, znajšli staronki ŭ sacsietkach, pahavaryli z baćkami.
Daviedajciesia i vy.
Čytajcie taksama: Dzieci biełaruskich top-čynoŭnikaŭ: chto jany? FOTY (2015 hod)
Čytajcie taksama: Dzie pracujuć dzieci biełaruskich čynoŭnikaŭ? (2013 hod)
U Mikałaja Statkieviča dźvie dački ad pieršaha šlubu, abiedźvie žyvuć u Niamieččynie.
Vučylisia jany ŭ Biełarusi, ale potym pa daśledčyckich prahramach pajechali vučycca za miažu i tam zastalisia. Adna z dačok, Kaciaryna, navat abaraniła doktarskuju — žyvie ŭ Inhalštacie. Jaje profil — pramysłovaja łahistyka.
Kaciaryna Statkievič.
Hanna Statkievič.
Abiedźvie — zamužam za emihrantami z byłoha SSSR.
U deputatki Hanny Kanapackaj dvoje dziaciej, žyvuć jany taksama ŭ Hiermanii.
«Dzieci ŭ Niamieččynie nie zastanucca, skazali, što buduć viartacca ŭ Biełaruś — heta nie majo, ich rašeńnie», — zapeŭnivała deputat paśla abrańnia ŭ Pałatu pradstaŭnikoŭ.
U lidara AHP Anatola Labiedźki adzin syn, jamu 32 hady, pracuje ŭ Minsku.
Arciom Labiedźka.
Doŭhi čas chłopiec nie moh adšukać u Biełarusi rabotu, choć skončyŭ prestyžny fakultet mižnarodnych adnosin BDU. Jak kaža Labiedźka-starejšy, jon užo sam padbuchtorvaŭ syna pašukać rabotu za miažoj, ale ŭrešcie skleiłasia — chłopca ŭziali ŭ adnu minskuju kampaniju ŭ śfiery nieruchomaści.
«Nie budu adkazvać. Heta pryvatnyja spravy, usiaho dobraha», — tak na pytańnie pra dziaciej adkazaŭ nam movaznaŭca i adzin ź lidaraŭ arhkamiteta «Biełaruskaha ruchu» Vincuk Viačorka.
Viadoma, što ŭ Vincuka troje dziaciej. Starejšaja dačka Radasłava žyvie ŭ Barsiełonie.
Akaŭnt Radasłavy Viačorki. Fota Siarhieja Hudzilina.
Siaredniamu synu, Franaku, chutka budzie 30 hadoŭ, jon pracuje ŭ Biełaruskaj słužbie amierykanskaha «Radyjo Svaboda», a ŭ dadzieny momant vučycca va ŭniviersitecie ŭ ZŠA.
Małodšaja ž dačka Vincuka, Ružana, vučycca na bijafaku Biełaruskaha dziaržaŭnaha ŭniviersiteta ŭ Minsku.
Ružana Viačorka.
U deputatki Aleny Anisim troje darosłych synoŭ, usie žyvuć u Biełarusi.
Vyšejšaj adukacyi, da žalu baćkoŭ, nie atrymali, raskazvała Anisim. Ale ŭsie dzieci pry spravie: adzin ramantuje mašyny, druhi — telefony, treci pracuje achoŭnikam.
U staršyni Biełaruskaha kanhresu demakratyčnych prafsajuzaŭ Alaksandra Jarašuka troje synoŭ, dvoje ź ich žyvuć u Biełarusi, treci ŭžo 11 hadoŭ žyvie ŭ Ńju-Jorku.
Jon pierajechaŭ tudy, vyjhraŭšy amierykanskuju hryn-kartu. Jak kaža Jarašuk, syn zastajecca patryjotam Biełarusi i pryjazdžaje na radzimu adzin raz na hod.
Lidar kamunistyčnaj partyi «Spraviadlivy śviet» Siarhiej Kalakin maje dvaich dziaciej, jany pracujuć u Minsku.
Aboje ŭžo darosłyja: dačce 36 hod, synu 25. Jany inžyniery, dačka pracuje na zavodzie, a syn — u pryvatnaj kampanii.
U paeta Uładzimira Niaklajeva dźvie dački. Starejšaja žyvie ŭ Maskvie — pierajechała tudy jašče za Savietami. Małodšaja žyvie ŭ Chielsinki, pracuje mieniedžarkaj u kulturnaj śfiery.
Jeva Niaklajeva z baćkam.
Zianon Paźniak rodnych dziaciej nie maje, ale ŭ jaho jość pryjomnaja dačka Nadzieja. Jana pracuje na telekanale «Biełsat», žyvie ŭ Varšavie.
Jana zamužam za takim ža biełarusam-emihrantam.
Nadzieja, pryjomnaja dačka Paźniaka.
Starejšy syn Alesia Łahvinca, Antoś, voś tolki-tolki skončyŭ varšaŭski palitech, ciapier šukaje rabotu, małodšy jašče mały.
Aleś Łahviniec z synami.
«Pracu Antoś šukaje ŭ Biełarusi i Polščy, — skazaŭ nam Łahviniec. — Ja vielmi chaču, kab maje syny byli prystojnymi ludźmi i biełarusami, dzie ž jany buduć znachodzicca — sprava ichniaha vybaru. Naprykład, dva hady pavučycca ŭ Francyi i viarnucca ŭ Biełaruś mnie ničoha nie pieraškodziła. Možna paznavać inšyja kultury, a potym viarnucca ŭ Biełaruś. A možna zarablać hrošy i dziejničać na karyść Biełarusi z-za miažy».
U šmathadovaha staršyni Tavarystva biełaruskaj movy Aleha Trusava adna dačka.
«Žyvie jana, viadoma, u Biełarusi, — zapeŭniŭ Trusaŭ. — Skončyła Univiersitet kultury, ciapier pracuje ŭ biblijatecy. A ŭnučka vučycca ŭ biełaruskamoŭnaj himnazii».
Dačka Dźmitryja Bandarenki z «Chartyi'97», Julija, žyvie ŭ Polščy, jak i jaje baćka.
Niadaŭna, kali «Chartyju-97» štarmiła, hety papularny partał pierarehistravali na jaje.
U Viačasłava Siŭčyka dvoje synoŭ: adzin žyvie ŭ Finlandyi, druhi vučycca ŭ Polščy.
Vitaŭt Siŭčyk (u centry).
«Małodšy vučycca ŭ Varšaŭskim univiersitecie [pa prahramie Kalinoŭskaha], śpiecyjalnaść kštałtu «ekśpiert pa spravach Uschodniaj Jeŭropy», užo na druhim kursie mahistratury, — raskazała nam Hanna Siŭčyk, žonka Viačasłava. — Jon tam maje pracu [pracuje na «Biełsacie» — NN], ale pra dalejšyja płany pakul nieviadoma, chłopcu 22 hady. A jašče adzin pracuje u Finlandyi, jamu ŭžo 31 hod. Paralelna vučycca ŭ daktarantury».
U siamji eks-kandydata ŭ prezidenty Alaksandra Milinkieviča troje synoŭ.
Dva ź ich zastalisia ŭ Polščy paśla navučańnia pa prahramie Kalinoŭskaha.
«Ihar Kulej pracuje na «Biełsacie», biez našaj dapamohi ŭładkavaŭsia, pa konkursie, — skazaŭ «Našaj Nivie» Milinkievič. — A Vitaŭt Milinkievič zajmajecca biznesam — raźvivaje aŭtamabilny servis».
Ihar Kulej.
«Jość jašče starejšy syn, Alaksandr, žyvie pad Harodniaj, u vioscy Bieršty, adkul pachodzić rod Milinkievičaŭ — tam sprabuje zialonym turyzmam zajmacca. Ci nie prykra, što źjechali? Viedajecie, pavinny być mahčymaści viartańnia dla tych ludziej, jakija atrymali na Zachadzie adukacyju. Bo heta niaprostaja sprava: z napruhaj pryznajucca bakałaŭryjaty, mahistarskija — ciažka, a doktarskija treba nanoŭ abaraniać. Heta surjoznaja prablema, ale jość jašče adna — prablema samarealizacyi. Ja chacieŭ by, kab jany viarnulisia. Ale tak było i ŭ historyi Čechii, Hruzii, Estonii, Polščy… Kali ludzi nabiralisia dośviedu, a potym viartalisia ŭ čas reformaŭ dapamahać krainie. Ja dumaju, što i ŭ nas tak budzie. I kazać, što abaviazkova ŭsie pavinny pryjechać i być tut biespracoŭnymi — heta nierazumna i niesumlenna».
Staršynia BNF Ryhor Kastusioŭ vyhadavaŭ traich dziaciej — dźviuch dačok i syna.
«Starejšaja, Halina, skončyła mahiloŭski Pieduniviersitet, ciapier hladzić traich dziaciej. Druhaja dačka, Kaciaryna, skončyła škołu z załatym miedalom, paśla Akademiju muzyki i ciapier vučyć muzycy inšych — pracuje ŭ Mahilovie. Syn Andrej [pa prahramie Kalinoŭskaha] skončyŭ univiersitet u Hdańsku, tam ža daktaranturu, i ciapier tam zajmajecca biznesam. Jon chacieŭ by i viarnucca siudy, čakaje, pakul jaho dziaŭčyna skončyć univiersitet. Ale spačatku i tut treba znajści pracu, bo papiaredni dośvied tak sabie: biez pracy niekalki razoŭ zastavaŭsia ja sam, zvalniali sa škoły maju starejšuju dačku, zvalniali druhuju dačku za dapamohu baćku, u syna byli tut prablemy z vučobaj i jon vymušany byŭ źjechać na vučobu, chacia i byŭ pieramožcam abłasnych alimpijad», — raskazvaje Kastusioŭ.
U prafsajuznaha lidara Hienadzia Fiadyniča dvoje synoŭ, abodva žyvuć u Biełarusi.
«Małodšy IT-šnik, starejšy zaniaty ŭ śfiery rekłamy, tam sumiesnaje pradpryjemstva ź jeŭrapiejcami», — patłumačyŭ Fiadynič.
U fiłosafa i kolišniaha kiraŭnika «JeŭraBiełarusi» Uładzimira Mackieviča dvoje dziaciej ad roznych šlubaŭ.
«U mianie jość syn ad pieršaha šlubu, kali ja žyŭ u Łatvii. Jon napałovu łatyš, hramadzianin Łatvii, ale ŭ pašparcie jon siabie piša biełarusam — u ich tam jość takaja hrafa. Ale ciapier jon pracuje ŭ Łondanie, maje dziaciej.
A dačka ad druhoha šlubu vučyłasia zavočna ŭ Narhasie i na dzionnym u Varšavie. Potym pracavała tut, u kansałtynhavaj firmie. Ale atrymała stypiendyju na navučańnie ŭ Varšaŭskim univiersitecie na mižnarodnych finansavych adnosinach, skončyła. Joj prapanoŭvali pracavać u «Varhiejminhu», ale nie ŭ minskim ofisie, tamu jana admoviłasia, bo chacieła štości tut. Nu i ciapier robić u Polščy, padvyšaje kvalifikacyju, ale i šukaje štości tut. Jana davoli dobry śpiecyjalist, tamu na aby-što nie pojdzie», — skazaŭ Mackievič.
Syn pravaabaroncy Alesia Bialackaha, Adam Bialacki, žyvie ŭ Polščy, kudy vyjechaŭ pa prahramie Kalinoŭskaha. Pierad tym jon vučyŭsia ŭ minskaj Akademii mastactvaŭ.
U śfiery mastactvaŭ jon i sprabuje siabie realizoŭvać.
Adam Bialacki.
U lidara «Havary praŭdu» Andreja Dźmitryjeva troje dziaciej — starejšy, ad pieršaha šlubu, pastupiŭ u Akademiju mastactvaŭ, małodšyja, ad druhoha šlubu, jašče nie pajšli ŭ škołu.
Mały syn Andreja Sańnikava razam z maci Irynaj Chalip, žyvie ŭ Minsku.
Sam Sańnikaŭ — u Varšavie, jon pakinuŭ Biełaruś paśla taho, jak jaho źniavolili za arhanizacyju paślavybarčych pratestaŭ u 2010.
U Vitala Rymašeŭskaha taksama małaja dačka.
Dačka Siarhieja Navumčyka razam z baćkami žyvie ŭ Čechii.
Synu Taćciany Karatkievič 14 hadoŭ, jon jašče školnik, vučycca ŭ Minsku.
U Źmitra Daškieviča — dvoje małych, u Jarasłava Ramančuka taksama dziciu niekalki hadoŭ.
