Alaksandr Łukašenka svaim ukazam źniaŭ z pasady kiraŭnika ŭpraŭleńnia terytaryjalnaj abarony hienierał-majora Siarhieja Dudko, na hetaje miesca pryznačany jahony namieśnik Andrej Pasieka.
Pasieka daŭno pracavaŭ u Hienštabie, u siaredzinie 2000-ch jon kuryravaŭ stvareńnie biełaruskich bieśpiłotnikaŭ, źjaŭlajučysia pry hetym načalnikam adździeła kiravańnia rakietnych vojskaŭ i artyleryi.
Andrej Pasieka pa centry, uručaje hramatu. Fota gorki.by
Potym, u 2013-m, Pasieka z załatym miedalom i čyrvonym dypłomam skončyŭ fakultet Hienieralnaha štaba Vajennaj akademii.
Ci jość niejkija inšyja tłumačeńni hetaj źmieny, aproč vidavočnaj, što Dudko zamianili pa ŭzroście? My spytalisia pra heta ŭ vajskovaha ekśpierta Alaksandra Alesina.
«Tut možna być jašče takoje tłumačeńnie, što terytaryjalnaja abarona nie zusim adpaviadaje zadumanamu Łukašenkam, bo jaje bajavyja jakaści dalokija ad zapłanavanaha. Kab štości było bolš-mienš dziejazdolnaje, treba ŭvieści bajavuju vučobu, a nie tolki pieryjadyčna źbirać starych dziadźkaŭ i abuvać ich u biercy. Ja dumaju, što heta moža być i ŭ suviazi z tym, što pavyšajucca patrabavańni da terytaryjalnaj abarony. Mahčyma, Łukašenka ličyć, što Pasieka — heta čałaviek, schilny da navacyj, ź jašče niezakaścianiełym rozumam, i jon choča ź jaho dapamohaj palepšyć padrychtoŭku, bo jon nie prosta «dasłužvaje», a štości choča zrabić», — skazaŭ Alesin.
***
U vypadku bajavych dziejańniaŭ na terytoryi Biełarusi, terytaryjalnaja abarona musić uziać na siabie častku zadač, jakija mohuć adciahvać rehularnaje vojska. U pryvatnaści, siarod funkcyj terytaryjalnaj abarony achova abjektaŭ, udzieł u likvidacyi nastupstvaŭ bambardzirovak, dapamoha ŭ achovie dziaržaŭnaj miažy, baraćba z dyviersantami.
Upraŭleńnie terytaryjalnaj abarony ŭvachodzić u strukturu Hienštaba i padparadkoŭvajecca pieršamu namieśniku ministra abarony, načalniku Hienštaba Alehu Biełakonievu.
