Ujavicie, što vam treba rastłumačyć čatyrochhadovamu dziciaci, čym vy zajmajeciesia. Što b vy adkazali?
Što my dapamahajem ludziam mieć znosiny z kampjutarami. Darosłamu čałavieku ja b skazaŭ, što my dapamahajem rabotnikam bujnych kampanij, u jakich niama techničnych navykaŭ, razumieć vialikija danyja. Zrabić heta dazvalaje moŭny interfiejs dla baz danych.
Luby čałaviek ź biznesu moža zadać pytańnie, naprykład: «Jakaja siaredniaja vyručka pa kankretnym pradukcie za minuły miesiac u Maskvie?». My pieraŭtvarajem takija pytańni ŭ zapyty da baz danych i viartajem karystalniku adkaz u zručnaj dla jaho formie: vizualizacyi, spravazdač, prostaj analityki abo pramych adkazaŭ.
Vy pierajechali ŭślapuju — biez płana, znajomych?
U nas była meta — źjechać u ZŠA i my šukali roznyja mahčymaści. Nas zaprasili ŭdzielničać u prahramie aksieleratara Starta. U 2016 hodzie my pierajechali ŭ Ńju-Jork, prajšli praz hetuju prahramu, a paśla pierabralisia na Zachodniaje ŭźbiarežža ŭ Kramianiovuju dalinu, dzie ŭziali ŭdzieł u 500 Startups.
Čamu vy vyrašyli raźvivać pradukt dla amierykanskaha rynku, a nie dla rasijskaha?
Pačniom z taho, što my biełarusy. U Biełarusi niama ŭnutranaha rynku, tamu mnohija startapy ŭ krainie aryjentavany na hłabalny rynak albo na vialikija rynki (jak amierykanski). Samy vialiki rynak analityki danych znachodzicca mienavita ŭ ZŠA. Ja liču, što luby startap pavinien pieršapačatkova być skiravany na samy vialiki rynak.
Pierad pierajezdam u ZŠA lepš papiarednie pačynać zandziravać hrunt?
Biezumoŭna. Tamu što vienčurny kapitał kansiervatyŭny. Niemahčyma atrymać hrošy ad inviestaraŭ, razmaŭlajučy ź imi tolki pa telefonie ci na pieršym tydni znajomstva.
Važna vybudoŭvać adnosiny zahadzia, pakazvać prahres kampanii i asabisty rost i pracavać nad svajoj reputacyjaj. Reputacyja vybudoŭvajecca hadami. U Kramianiovaj dalinie adnosiny važnyja nie tolki ŭ fandrajzinhu, ale i ŭ prodažach abo ŭ najmańni ludziej.
Vy zapuścili Fetch usiaho za paŭhoda — heta chutka.
My pracavali dzień i noč. Kali paraŭnać nas z kankurentami, to my vyjšli na rynak i zapuścili pradukt značna chutčej, zrabili ŭsio ź mienšymi resursami i kamandaj.
Ci moža mašyna nie viedać adkazu na pytańnie, jakoje joj zadajuć?
Viadoma. Kali ŭ vas jość baza danych, jakaja zachoŭvaje kaciroŭki na fondavaj biržy, ale pry hetym vy zadajecie pytańnie pra nadvorje ŭ Bostanie, to sistema nie zmoža znajści adkaz na hetaje pytańnie.
Na ŭzroŭni praduktu my staralisia dapamahčy karystalniku zadavać pravilnyja pytańni z dapamohaj «razumnaha» aŭtakamplita — sistemy, jakaja dapaŭniaje pytańni karystalnika i padkazvaje, jak pravilna zadać abo pierafarmulavać pytańnie.
Chto vašyja klijenty ciapier?
Ciapier kampanija ŭvajšła ŭ skład ServiceNow — amierykanskuju karparacyju, jakaja zajmajecca chmarnymi vyličeńniami. U ServiceNow niekalki tysiač bujnych klijentaŭ.
Sumu ŭhody nie nazyvajecie?
Nie.
Ci płanujecie vy viartacca ŭ Biełaruś?
Ja žyvu ŭ Amierycy dva hady i baču šmat mahčymaściaŭ na hetym rynku, ale pry hetym płanuju praciahvać dapamahać startapam, u tym liku z Rasii i Biełarusi. Akramia mientarstva, ja zmahu dapamahčy hrašyma.
Vy sočycie za startapami suajčyńnikaŭ i kansultujecie ich?
Ja zaŭsiody staraŭsia dapamahčy, ale zaraz pastupaje stolki pytańniaŭ i zajavak, što ja fizična nie paśpiavaju prakansultavać usich. Ja vyrašyŭ sfakusavacca na tych halinach, u jakich u mianie jość ekśpiertyza, — enterprise-soft, danyja, deep-tech i AI.
