18 krasavika akruhovy administracyjny sud Kijeva pryznaŭ niezakonnaj nacyjanalizacyju «Pryvatbanka» apalnaha ŭkrainskaha aliharcha Ihara Kałamojskaha. Taksama imia Kałamojskaha rehularna ŭspłyvaje ŭ apošnija miesiacy ŭ kantekście jaho suviaziaŭ ź pieramožcam prezidenckaj honki va Ukrainie — Uładzimiram Zialenskim.
Chto taki Ihar Kałamojski? «Naša Niva» sabrała top-7 faktaŭ pra ŭpłyvovaha i ekstravahantnaha aliharcha, jaki pa svaich akciorskich zdolnaściach mała ŭ čym sastupaje Uładzimiru Zialenskamu.
1. Vałodaje najbujniejšym miedyjachołdynham va Ukrainie
Niahledziačy na kanflikt z prezidentam Ukrainy i vymušany adjezd, Ihar Kałamojski zachoŭvaje vielizarny ŭpłyŭ va Ukrainie na infarmacyjnuju śfieru. Jon kantraluje nie tolki najbujniejšy ŭkrainski telekanał «1+1», pad jaho kantrolem znachodzicca taksama adnajmiennaja miedyjahrupa, u jakuju ŭvachodziać 7 telekanałaŭ («1+1», «2+2», «TIET», «PlusPlus», «Bihudi», «UNIAN TB», «1+1 International»), vialikaja kolkaść pradakšn-studyj. Aproč ich, hrupie naležać navinavyja sajty TSN.ua, infarmacyjnaje ahienctva UNIAN i «Hłavried», a taksama internet-sajty «Tielekritika» i «Dusia». Akramia taho, miedyjahrupa vałodaje ŭkrainskim apierataram spadarožnikavaha telebačańnia «Viasat Ukraina», a taksama zajmajecca dystrybucyjaj šmatlikich ukrainskich i zamiežnych telekanałaŭ.
Fota: telekritika.ua.
U 2018 hodzie Kałamojski staŭ inviestaram internet-miedyja «The Babiel», uładalnikami jakoha byli mieniedžary «1+1».
2. Stvaryŭ adzin z samych inavacyjnych bankaŭ u Jeŭropie
U 1992 hodzie va ŭkrainskim Dniapry (tady Dnieprapiatroŭsku) Kałamojski razam ź biznes-partnioram Hienadziem Bahalubavym stvaryŭ Pryvatbank — najbujniejšy ŭkrainski bank, jaki źjaŭlajecca hałoŭnaj arteryjaj dla finansavaj sistemy ŭsioj krainy.
Bankamaty i terminały Pryvatbanka jość va Ukrainie amal na kožnym kroku. Heta sistemaŭtvaralny bank, z dapamohaj jakoha značnaja častka ŭkraincaŭ atrymlivaje zarpłaty, piensii i stypiendyi.
Niahledziačy na ciažkaje ekanamičnaje stanovišča va Ukrainie i prablemy z bankaŭskaj sistemaj, sam Pryvatbank źjaŭlajecca samym inavacyjnym va Ukrainie i adnym z samych inavacyjnych u Jeŭropie.
Jašče ŭ 1999 hodzie bank prapanavaŭ svaim klijentam SMS-bankinh, u 2000 źjaviŭsia internet-bankinh, u 2006 hodzie Pryvatbank dazvoliŭ pieravodzić hrošy na kartku praź internet. U 2008 hodzie źjaviłasia ŭłasnaja apłatnaja sistema LiqRay, jakoj možna karystacca va ŭsim śviecie. U 2011 hodzie źjaviłasia elektronnaja inkasacyja, a ŭ 2012 — mahčymaść atrymać hatoŭku ŭ bankamacie biez kartki (dastatkova prosta ŭ mabilnaj prahramie praskanavać QR‑kod z ekrana bankamata). I heta daloka nie poŭny pieralik inavacyj Pryvatbanka.
Varta adznačyć, što takim inavacyjnym i prasunutym bank zrabiŭ nie Kałamojski, a siamja Dubiletaŭ. Alaksandr Dubilet źjaŭlaŭsia kiraŭnikom praŭleńnia, a jaho syn Dźmitryj u 2010 hodzie staŭ IT-kiraŭnikom Pryvatbanka.
Pryvatbank — adzin z hałoŭnych aktyvaŭ finansava-pramysłovaj hrupy «Pryvat» Kałamojskaha. U kancy 2016 hoda Ukrainskaja dziaržava nacyjanalizavała Pryvatbank. Pavodle Nacyjanalnaha banka Ukrainy, uładalniki Pryvatbanka vyvodzili praz bank miljardy dalaraŭ, dajučy kredyty naprava i naleva afilavanym asobam.
Heta zrabiła Pryvatbank niepłaciežazdolnym, što pastaviła ŭsiu bankaŭskuju sistemu Ukrainy na miažu kałapsu. Nacyjanalizacyju banka padtrymali MVF, JEBRR, urady Vialikabrytanii i ZŠA. Dziaržava vymušana była ŭkładać vialikija hrošy, kab uratavać hihanta.
Ale chutka ŭsio moža źmianicca. 18 krasavika 2019 hoda akruhovy administracyjny sud Kijeva zadavoliŭ pazoŭ Ihara Kałamojskaha, pastanaviŭšy, što rašeńnie ab nacyjanalizacyi banka było pryniata z parušeńniem zakanadaŭstva. Z abrańniem novaha prezidenta Ukrainy bank moža znoŭ viarnucca va ŭłasnaść Kałamojskaha.
Sam Kałamojski ličyć nacyjanalizacyju Pryvatbanka niezakonnaj. Pavodle jaho słoŭ, Parašenku vielmi cikaviŭ kantrol nad miedyjahrupaj «1+1». U zakładach Pryvatbanka nibyta byli akcyi «1+1 pradakšn». Ale «1+1 pradakšn» — nie miedyjahrupa, a ŭsiaho tolki kampanija, jakaja robić kantent. Pa słovach Kałamojskaha, Parašenka pierabłytaŭ «1+1» i «1+1 pradakšn», nacyjanalizavaŭ Pryvatbank, ale ŭ vyniku tak i nie atrymaŭ kantrolu nad žadanym aktyvam.
Pryvatbank — tolki viaršynia ajśbierha finansava-pramysłovaj hrupy «Pryvat» Kałamojskaha. Tudy ŭvachodziać bolš za 100 pradpryjemstvaŭ. Aktyvy Kałamojskaha aceńvalisia ŭ niekatoryja hady ŭ 6,5 miljarda dalaraŭ. U 2018 hodzie Forbes acaniŭ jaho aktyvy ŭ 1 miljard dalaraŭ.
Hrupie «Pryvat» prypisvajucca šmatlikija vypadki rejdarskich zachopaŭ pradpryjemstvaŭ. Ukrainskija žurnalisty śćviardžajuć, što ŭ «Pryvat» uvachodziać achoŭnyja pradpryjemstvy, jakija ŭdzielničajuć u siłavym prykryćci rejdarskich apieracyj.
3. Iudziej, stvaryŭ u Dniapry bujniejšy ŭ śviecie kulturna-dziełavy jaŭrejski centr
Ihar Kałamojski naradziŭsia ŭ jaŭrejskaj siamji. Jon adzin z tych, chto nie tolki nie ŭtojvaje svaje jaŭrejskaje pachodžańnie, ale ŭsialak jaho padkreślivaje. Kałamojski apiakujecca jaŭrejskaj supołkaj u rodnym Dniapry, pabudavaŭ tam najbujniejšy ŭ śviecie jaŭrejski kulturna-dziełavy jaŭrejski centr «Mienora», źjaŭlajecca prezidentam «Abjadnanaha jaŭrejskaha tavarystva Ukrainy», uvachodzić u orhany kiravańnia niekatorych jaŭrejskich arhanizacyj u Jeŭropie. Taksama Kałamojski dapamahaŭ u ramoncie tunelaŭ uzdoŭž Ściany płaču i adradžeńni histaryčnaj sinahohi «Churva» u Jerusalimie.
Kałamojski na adkryćci centra «Mienora».
Centr «Mienora».
4. Maje try pašparty, ale nie ličyć heta parušeńniem zakonaŭ
Ihar Kałamojski zajaviŭ, što ŭ jaho try hramadzianstvy — ukrainskaje, izrailskaje i kiprskaje.
«Akramia ŭkrainskaha? Izrailski i kiprski jość», — adkazaŭ jon na pytańnie žurnalistaŭ, pašparty jakich krain u jaho jość.
Na ŭdakładnieńnie, nakolki heta adpaviadaje ŭkrainskamu zakanadaŭstvu, Kałamojski adkazaŭ: «U Kanstytucyi napisana, što zabaroniena padvojnaje hramadzianstva. A patrojnaje — nie zabaroniena».
5. Viadomy svajoj skandalnaj manieraj znosin z žurnalistami i biznes-partniorami
Kałamojski — vielmi charyzmatyčny aliharch, čyje intervju i hutarki chutka raźbirajuć na cytaty.
Časam jon nie saromiejeca abmaciukać žurnalistaŭ i svaich partnioraŭ pa biznesie. Voś tolki niekatoryja videa, jakija pakazvajuć śpiecyfičnuju manieru znosin Kałamojskaha.
UVAHA! Niekatoryja videa źmiaščajuć niecenzurnyja słovy i vyrazy!
Kałamojski zaŭsiody byŭ abjektam žartaŭ na ŭkrainskim telebačańni, u tym liku ŭ «Viačernim Kvartale», jaki vychodzić na kanale Kałamojskaha «1+1». Kałamojskaha paradziravaŭ Uładzimir Zialenski.
6. Prapanoŭvaŭ $10 000 za hałavu luboha rasijskaha dyviersanta, čym uratavaŭ Dniapro i Adesu ad stvareńnia tam «narodnych respublik»
Fota: Jevropiejśka pravda.
2 sakavika 2014 hoda, u razhar tak zvanaj «ruskaj viasny», Kałamojski staŭ hubiernataram Dnieprapiatroŭskaj vobłaści. Niespakojna tady było va ŭsich abłaściach Paŭdniova-Uschodniaj Ukrainy, i było całkam realna, što Ukraina mahła stracić kantrol nad situacyjaj u Dnieprapiatroŭskaj i inšych abłaściach rehijonu.
Dnieprapiatroŭskaja vobłaść — pramysłovaje «serca» Ukrainy, stratehična važny rehijon, stratu jakoha (jak i Adesy) Ukraina mahła b prosta nie pieražyć. Tam znachodzicca vialikaja kolkaść aktyvaŭ Kałamojskaha, u tym liku klučavyja — Kremienčuhski NPZ, Stachanaŭski, Zaparožski i Nikopalski fieraspłaŭnyja zavody. A praz Adeski port idzie ekspart hetych fieraspłavaŭ. Tamu Kałamojski mieŭ asabistuju zacikaŭlenaść, kab abaranić hetyja vobłaści ad rasijskaj ahresii.
Kałamojski ŭtrymlivaŭ Połk nacyjanalnaj abarony Dnieprapiatroŭskaj vobłaści, dapamahaŭ finansava dobraachvotnickim bataljonam terytaryjalnaj abarony Ministerstva abarony Ukrainy i dobraachvotnickim śpiecbataljonam MUS Ukrainy. Taksama jon mieŭ na ŭtrymańni šerah ułasnych dobraachvotnickich uzbrojenych farmiravańniaŭ, takich jak bataljony «Šturm» i «Dniepr». Akramia hetaha, Kałamojski płaciŭ pa 10 tysiač dalaraŭ za kožnaha zachoplenaha pradstaŭnika tak zvanych «DNR» i «ŁNR».
Navat palityčnyja praciŭniki Kałamojskaha pryznavali, što jaho rola ŭ stabilizacyi situacyi ŭ paŭdniova-ŭschodnich rehijonach była klučavoj. Na toj momant biznes-intaresy Kałamojskaha całkam supadali ź intaresami ŭkrainskaj dziaržavy.
Ale viasnoj 2015 hoda ŭsio źmianiłasia. U Kałamojskaha i ŭkrainskaj dziaržavy ŭźnik kanflikt vakoł «Ukrtransnafty», u jakoj struktury Kałamojskaha mieli 42% akcyj. U sakaviku 2015 hoda Kałamojski zajšoŭ u budynak «Ukrtransnafty» z uzbrojenymi ludźmi. Jon kazaŭ, što takim čynam chacieŭ abaranić kampaniju ad mifičnych «ruskich dyviersantaŭ». 24 sakavika 2015 hoda Piatro Parašenka padpisaŭ ukaz ab adstaŭcy Kałamojskaha z pasady Dnieprapiatroŭskaj abłasnoj dziaržaŭnaj administracyi.
Paśla hetaj historyi, a taksama paśla nacyjanalizacyi Pryvatbanka, Kałamojski nieadnarazova zajaŭlaŭ, što Parašenka źjaŭlajecca jaho asabistym voraham. U apošni raz Kałamojski pryjazdžaŭ va Ukrainu ŭ červieni 2017 hoda. Jon aścierahaŭsia, što kali vierniecca va Ukrainu, to moža adtul užo nie źjechać.
Kałamojski nieadnarazova zajaŭlaŭ, što hatovy padtrymać luboha kandydata ŭ prezidenty Ukrainy, akramia Piatra Parašenki.
Parašenka i Kałamojski. Fota: president.gov.ua.
7. Suviazi z Uładzimiram Zialenskim
Zialenski paradziruje Kałamojskaha.
Krytyki pieramožcy prezidenckaj honki va Ukrainie Uładzimira Zialenskaha narakajuć, što biehły aliharch maje vialiki ŭpłyŭ na maładoha i niedaśviedčanaha Zialenskaha, jaki źjaŭlajecca jaho maryjanietkaj. Takija padazreńni ŭźnikajuć u pieršuju čarhu z-za taho, što šou studyi «95-y Kvartał» Zialenskaha vychodziać pieravažna na telekanale Kałamojskaha «1+1».
Sami Zialenski i Kałamojski heta abviarhajuć. Kałamojski kaža, što Zialenski — całkam samastojnaja fihura, jaho kanał usiaho tolki kuplaje telepradukcyju Zialenskaha, i što jon nie maje nijakaha ŭpłyvu na šoŭmena. Zialenski taksama kaža, što nie pracuje na Kałamojskaha, i zapeŭnivaje — jon nie vinavaty, što bujniejšyja ŭkrainskija telekanały naležać aliharcham.
Ale apošnija rasśledavańni ŭkrainskich žurnalistaŭ pakazvajuć, što Kałamojski kali i nie maje ŭpłyvu na Zialenskaha, to dakładna źjaŭlajecca jaho biznes-partnioram.
Uładzimir Zialenski na praciahu dvuch apošnich hadoŭ minimum 11 razoŭ lotaŭ u Ženievu, kali tam žyŭ Kałamojski, a paśla jaho pierajezdu ŭ Izrail jašče dva razy źlataŭ u Tel-Aviŭ.
Padčas kožnaj druhoj pajezdki šoŭmena supravadžaŭ juryst aliharcha Andrej Bohdan, jaki ŭ vyniku staŭ hałoŭnym jurydyčnym daradcam kampanii Zialenskaha na vybarach prezidenta.
Zialenski na praciahu hetaha času nie raz lataŭ na pryvatnych samalotach razam ź biznes-partniorami aliharcha — Hienadziem Bahalubavym, Iharam i Ryhoram Surkisami, Cimuram Mindzičam.
