Da šasci hadoŭ pazbaŭleńnia voli z kanfiskacyjaj majomasci asudžany asistent kafiedry chirurhii Viciebskaj dziaržaŭnaj akademii vieterynarnaj miedycyny.
Za hod jon niezakonna zarabiŭ 350 tysiač rubloŭ. I treba było parušać zakon?
Vasil Ivanavič (nazaviom jaho tak) prymaŭ zaliki pa pradmiecie «Apieratyŭnaja chirurhija z tapahrafičnaj anatomijaj». Dla niepadkavanych čytačoŭ, napeŭna, sama nazva pradmieta vielmi składanaja. A budučym vieterynaram nieabchodna viedać usie niuansy.
Vykładčyk byŭ strohim.
Voś adna studentka dvojčy sprabavała abaranić kursavuju rabotu pa temie… «Kastracyja kata». Biednaja studentka, a jak škada kata!Dyk voś, čaplaŭsia asistent da čaho‑niebudź u rabocie i adznaku nie staviŭ.
Zatoje inšyja studenty razumieli: možna «znajsci padychod» da vykładčyka. Pa akademii chadzili čutki — za 30 tysiač možna i zalik atrymać biez pravierki viedaŭ, dy i kursavuju rabotu abaranić, atrymaŭšy nieabchodnuju acenku.
Jak paviedamiła «Źviaździe» staršy pamočnik prakurora Viciebskaj vobłasci Iryna Taŭtyn, u chodzie śledstva vyjavili niekalki takich studentaŭ. Sumy chabaru byli roznyja — ad 20 da 45 tysiač rubloŭ. Čatyry studentki pieradali asistentu 140 tysiač rubloŭ za vystaŭleńnie stanoŭčych adznak pa kursavych rabotach i dopusk da zdačy ekzamienu pa pradmiecie «Apieratyŭnaja chirurhija».
Nielha nie ŭzhadać i pamočnika asistenta — studenta hetaj ža akademii. Jon faktyčna byŭ pasrednikam: pieradavaŭ zalikoŭki studentaŭ i «achviaravanni». Za svaju dziejnaść atrymlivaŭ usiaho pa 5 tysiač rubloŭ z čałavieka za akazanyja pasłuhi. Nievialikija hrošy, ale ŭ studenta lišnich nie byvaje. Na hanarar za «ździełku» piva papić možna, cyharet kupić. U vyniku student hety ad usioj dušy «zdaŭ» asistenta pravaachoŭnym orhanam.
Pavodle słoŭ pamočnika prakurora Kastryčnickaha rajona Viciebska Julii Łazarenki, pa zahadzie rajonnaj prakuratury ŭ akademii ŭzmacnili kantrol. U pryvatnasci, abarona kursavych rabot ciapier budzie prymacca kamisijaj u składzie nie mienš za dva čałavieki. Vykładčyki razam z zahadčykami kafiedry abaviazany vyśvietlać pryčyny drennaj vučoby i propusku zaniatkaŭ studentami. Jašče abaviazany paviedamlać studentam kankretna — u jaki dzień budzie pravodzicca zalik, a jakoj hadzinie. Bolš za toje, studentam rekamiendavana paviedamlać dekanu pra vypadki, kali, na ich pohlad, vykładčyki «čaplajucca» da drobiaziaŭ albo niespraviadliva staviacca da ich. Pra heta, darečy, možna paviedamić i piśmova, kinuŭšy skarhu ŭ śpiecyjalnuju skrynku.
