Kryminalnaja sprava pa fakcie źbivańnia i vykradańnia lidera stvaranaha ruchu «Maładaja Biełaruś» Artura Fińkieviča prypyniena «z‑za niedachopu dokazaŭ».Jak paviedamiŭ BiełaPAN A.Fińkievič, adpaviedny list jon atrymaŭ 3 sakavika ź milicyi Pieršamajskaha rajona Minska za podpisam śledčaha Dźmitryja Śmirnova.
19 śniežnia 2008 hoda na Fińkieviča napali nieviadomyja, kali jon vyjšaŭ z padjezda svajho doma pa vulicy Parnikovaj. Napadaŭšyja źbili jaho z noh, nakinuli na hałavu vialikuju zimovuju šapku i zaciahnuli ŭ mikraaŭtobus. U Fińkieviča vyviernuli kišeni, zabrali dakumienty, kašalok (tam było kala 240 tys. rubloŭ) i klučy. Praz try hadziny jaho vysadzili z mašyny prykładna ŭ 25 kiłamietrach ad stalicy, u lesie. Aktyvist, kali dabraŭsia da Minska, adrazu ž nakiravaŭsia ŭ RUUS Pieršamajskaha rajona i napisaŭ zajavu ab źbivańni.
«Śledčyja z samaha pačatku pastavilisia da maich pakazańniaŭ ź niedavieram, — paviedamiŭ A.Fińkievič. — A praź dzień u mianie ŭ kvatery byŭ praviedzieny vobysk: milicyjaniery zabrali ŭsie nośbity infarmacyi, a taksama futbołki, ściahi i paviazki ź simvolikaj ruchu «Maładaja Biełaruś». Praź niekalki dzion u mikrarajonie Sierabranka mianie niečakana schapili ludzi ŭ cyvilnym i advieźli ŭ adździaleńnie milicyi Pieršamajskaha rajona, dzie dapytvali z prymianieńniem detektara chłuśni».
Kamientujučy rašeńnie ab prypynieńni spravy, maładziožny aktyvist zajaviŭ: «Pa dziejańniach supracoŭnikaŭ milicyi z samaha pačatku było bačna, što ŭsio idzie da hetaha. Mnie zdajecca, jany i nie sprabavali šukać sapraŭdnych złačyncaŭ».
