U pasiołku Kasaja Hara supracoŭnikami ŭpraŭleńnia kryminalnaha vyšuku Kryminalnaj milicyi pa Tulskaj vobłaści zatrymany ŭradženiec Viciebska Ihar Bułaŭka, jaki znachodzicca ŭ miždziaržaŭnym vyšuku.
Pra heta paviedamiŭ interniet‑resurs «Tulskije novosti».
Pavodle infarmacyi resursu, u Biełarusi ŭ dačynieńni da Bułaŭki
raspačata bolš za 40 kryminalnych spraŭ pa šerahu artykułaŭ kryminalnaha kodeksa.
Vyšukovaja sprava była zaviedziena ŭ 2006 hodzie.
«U milicyju pastupiła infarmacyja ab mahčymym pražyvańni vyšukvanaha na terytoryi Tuły. Było ŭstanoŭlena, što Bułaŭka ŭ dadzieny momant chavajecca ŭ pasiołku Kasaja Hara. Uličvajučy, što Bułaŭka ŭ minułym čempijon Biełarusi pa boksie, majstar sportu, aktyŭny člen arhanizavanaj złačynnaj hrupoŭki, złačynstvy jakoha adroźnivalisia dziorzkaściu i žorstkaściu, a taksama miarkujučy, što jon moh być uzbrojeny, zatrymańnie praviali siłami atrada milicyi śpiecyjalnaha pryznačeńnia UUS», — paviedamlaje interniet‑resurs. Paśla zatrymańnia 10 śniežnia złačynca byŭ dastaŭleny ŭ adździeł milicyi. Vyrašajecca pytańnie ab ekstradycyi Bułaŭki ŭ Biełaruś.
U Hałoŭnym upraŭleńni pa baraćbie z arhanizavanaj złačynnaściu i karupcyjaj (HUBAZ) MUS Biełarusi paćvierdzili, što sapraŭdy hety hramadzianin znachodzicca ŭ vyšuku z 2006 hoda,
jon źjaŭlajecca padazravanym va ŭdziele ŭ złačynnaj hrupoŭcy Rynasa, jakaja dziejničała ŭ Viciebskaj vobłaści z 1995 pa 2006 hady.
Zaraz HUBAZ čakaje paćviardžeńnie z Hienieralnaj prakuratury Rasii pra toje, što taki hramadzianin sapraŭdy zatrymany, tady budzie vyrašacca pytańnie ab vydačy złačyncy. Kryminalnaja sprava ŭ adnosinach da Bułaŭki była prypynienaja ŭ suviazi ź jaho vyšukam.
Banda Rynasa była nazvanaja pa proźviščy adnaho ź jaje lideraŭ, byłoha vajskoŭca pavietrana‑desantnych vojsk Uładzimira Rynasa. U studzieni 2009 hoda ŭdzielniki bandy Rynasa byli pryhavoranyja sudom da 2—14 hadoŭ pazbaŭleńnia voli. Hrupoŭka dziejničała na terytoryi Viciebskaj vobłaści ŭ 1995—2006 hadach. Raskryli bandu ŭ 2006 hodzie. Abvinavačvalisia jaje členy pa bolš čym sotni epizodaŭ złačynstvaŭ roznaj ciažkaści — stvareńnie złačynnaj arhanizacyi i ŭdzieł u joj, vymahalnictva roznych sum hrošaj u miascovych pradprymalnikaŭ, kradziažy, źniščeńnie majomaści, vykradańnie ludziej i niezakonnaje pazbaŭleńnie voli.
