Palitviazień Artur Fińkievič siońnia byŭ špitalizavany ŭ haradzkuju balnicu chutkaj medyčnaj dapamohi. A 14-j hadzinie jamu zrabili aperacyju na stupniach noh. Stan jahonaha zdaroŭja lekary nazvali zdavalniajučym.
Jak paviedamlaŭ raniej spadar Fińkievič, špitalizacyja nie źviazanaja sa znachodžańniem u papraŭčaj kalonii, jana planavaja. U špitali jon prabudzie dzion dziesiać.
Aktyvista niezarehistravanaj arhanizacyi «Małady front» Artura Fińkieviča pakarali dvuma hadami abmiežavańnia voli za hrafici palityčnaha źmiestu – «Dostał» i «My chočam novaha». Padčas vybarčaj kampanii Artur Fińkievič pravioŭ amal try miesiacy za kratami śledčaha izalataru. U papraŭčaj ustanovie Mahilova jon ad 29 červienia. Fińkievič pracuje na cahielni supolnaha biełaruska-polskaha pradpryjemstva «Dream». 9 śniežnia 2007 hodu Artur maje vyjści na volu.
