1 červienia pa prośbach ekołahaŭ pradstaŭniki hramadskaha abjadnańnia «Biełaruskaja fiederacyja padvodnaha sportu» (BFPS) dastanuć z voziera Rudakova, što ŭ nacyjanalnym parku «Naračanski», zatopleny korpus viertalota Mi‑2. Pra heta BiełaPAN paviedamiŭ staršynia BFPS Siarhiej Patrykiejeŭ.
Nahadajem, u pačatku 2010 hoda BFPS źviarnułasia da Minpryrody z prośbaj dazvolić zatapleńnie fiuzielaža viertalota Mi‑2 u voziery Rudakova. U zatoplenym viertalocie płanavałasia pravodzić padvodnyja ekskursii, navučać akvałanhistaŭ i vadałazaŭ. Z dazvołu administracyi nacyjanalnaha parka «Naračanski» i Minpryrody 26 sakavika zatapleńnie było praviedziena.
Adnak nieŭzabavie paśla hetaha zaniepakojenaść stanam voziera vykazali vučonyja BDU. Jany śćviardžali, što z časam mietał, ź jakoha zrobleny korpus viertalota, padvierhniecca karozii i pryviadzie da parušeńnia ekałohii voziera, hibieli ŭ im ryby.
U vyniku pravierki Minpryrody pa fakcie zvarotaŭ hramadskaści byli vyjaŭleny parušeńni pryrodaachoŭnaha zakanadaŭstva padčas praviadzieńnia zatapleńnia viertalota. Akazałasia, što fiuzielaž viertalota pahnuty, farba miescami adstała ad korpusa, unutry jaho znojdzieny pabočnyja pradmiety. U takim vyhladzie korpus viertalota ŭjaŭlaŭ niebiaśpieku jak dla ekałohii voziera, tak i dla zdaroŭja akvałanhistaŭ, zrabili vyvad śpiecyjalisty.
U suviazi z vyjaŭlenymi parušeńniami ŭ kancy krasavika Minpryrody źviarnułasia ź listami ŭ Biełaruskuju fiederacyju padvodnaha sportu i administracyju nacyjanalnaha parka «Naračanski» z pradpisańniem da 30 maja padniać fiuzielaž viertalota Mi‑2 z dna voziera. Pra padniaćcie viertalota Minpryrody pavinna być prainfarmavana da 7 červienia.
Jak paviedamiŭ Patrykiejeŭ, BFPS pakul admoviłasia ad płanaŭ zatapić u adnym z azioraŭ druhi niaspraŭny viertalot ci padobny abjekt dla praviadzieńnia padvodnych ekskursij, navučańnia akvałanhistaŭ. Pavodle jaho słoŭ, heta mieła b sens tolki ŭ vadajomie «z dobraj prazrystaj vadoj», na što ciažka atrymać zhodu pryrodaachoŭnych orhanaŭ i ekałahičnaj hramadskaści.
