Kala paŭsotni biełaruskich studentaŭ, jakija navučajucca ŭ Polščy pa stypendyjalnaj prahramie imia Kastusia Kalinoŭskaha, sabralisia ŭ niadzielu a 18 hadzinie kala budynku biuro prahramy, što mieścicca na terytoryi Varšaŭskaha ŭniversytetu, kab vykazać svajo niezadavalnieńnie. Nahodaj dla mitynhu stała pryznačeńnie na paniadziełak 25 vieraśnia ŭ 13 hadzin daty ŭračystaha zakryćcia «Padrychtoŭčych kursaŭ».
26 vieraśnia ŭsie biełarusy musiać raźjechacca pa roznych haradach, ale niečakana vyśvietliłasia, što bolš za 50 čałaviek admovilisia jechać pa nakiravańni ŭ inšyja ŭniversytety dy napisali apelacyjnyja skarhi. Biełaruskim studentam prapanavanyja varyjanty, što nie adpaviadajuć specyjalnaści. Studenty śćviardžajuć, što harady dy ŭniversytety nakiravańnia byli viadomyja daŭno, ale śpisy vyviesili tolki 20 vieraśnia. Prapanovami šmat chto byŭ šakavany. Vypadak kali studentu-mahiloŭcu, jaki vyvučaŭ markietynh prapanavali vučycca na metalurha patrapiŭ, navat, u polskuju presu. Samy składany momant – artystyčnyja prafesii. Vyśvietliłasia, što padobnaje navučańnie kaštuje zanadta doraha – nia mieniej za 10 tys. eŭra za adzin hod. U vyniku, kala siami čałaviek, siarod jakich byłyja studenty Biełaruskaj akademii mastactvaŭ dy muzyki, uvohule nie atrymali nijakaha raźmierkavańnia.
U toj ža čas u studenckim internacie «Babilon» Varšaŭskaj palitechniki, dzie žyvuć biełarusy, pa ŭsich pavierchach rasklejenyja abjavy, što ŭsie ŭdzielniki «stypendyjalnaj prahramy dla Biełarusi» musiać źjechać z pamiaškańnia da 8 hadziny ranicy 27 vieraśnia. Abjavy padpisanyja kiraŭnikom studenckaha internatu Vojcecham Syta. Na dalejšy termin žytło dla biełarusaŭ nie prapłačanaje – toj, chto nia maje raźmierkavańnia pačynajučy ź sierady ryzykuje zastacca na vulicy.
Kala 19 hadziny da studentaŭ pryjechaŭ Alaksandar Milinkievič, jaki ciapier znachodzicca ŭ Varšavie. Razam z pradstaŭnikom «kalinoŭcaŭ» Venedyktam Klaŭze jon pravioŭ pieramovy z dyrektaram «Studyjaŭ Uschodniaj Eŭropy» Varšaŭskaha ŭniversytetu Janam Malickim, jaki ŭłasna i rasparadžajecca ciapier losam biełaruskich studentaŭ.
Paśla paŭtarahadzinnaj sustrečy Milinkievič vyjšaŭ da studentaŭ razam z Malickim dy zapeŭniŭ, što vyjście budzie znojdziena. Malicki, u svaju čarhu, paabiacaŭ na praciahu nočy pieraraźmierkavać nakiravańni dy vyviesić novyja śpisy. Studenty pastavilisia da hetaj zajavy dosyć skieptyčna, ale ŭ vyniku razyšlisia, papiaredziŭšy, što nie dazvolać siabie padmanuć dy viernucca da temy na nastupny dzień.
