Jak paviedamlajuć infarmahienctvy, pačynajučy z 17 listapada na terytoryi 27 dziaržavaŭ Jeŭrapiejskaha sajuza usie cyharety, jakija pastupajuć na pryłaŭki kram, buduć hasnuć sami.
Vytvorcy cyharetaŭ abaviazanyja buduć pastaŭlać na rynak tolki cyharety novaha typu z tak zvanaj nizkaj schilnaściu da hareńnia, jakija zhasajuć sami praź niekatory čas. Vytvorcam u abaviazkovym paradku pradpisana vykarystoŭvać padčas vyrabu cyharetaŭ ciažkaŭzharalnuju papirosnuju papieru, jakaja nijakim čynam nie paŭpłyvaje ni na smak, ni na jakaść tytuniovaha vyrabu.
Miž tym kłopat z nahody novych cyharet vykazali miedyki.Jany kažuć, što padčas kureńnia takich cyharet kurcam daviadziecca čaściej zaciahvacca, a značyć, spažyvańnie tytuniu ŭzraście. Vytvorcy sa svajho boku papiaredzili, što antypažarnyja cyharety buduć daražejšyja za zvyčajnyja na 10–20%.
Jeŭrakamisija inicyjavała pryniaćcie novaj dyrektyvy ES z metaj skaracić kolkaść vypadkovych pažaraŭ, źviazanych ź niepatušanymi cyharetami. Dadzienyja za 2003–2008 hady pakazvajuć, što ŭ Jeŭrasajuzie kureńnie štohod źjaŭlajecca pryčynaj 30 tys. pažaraŭ, u vyniku jakich kala 1 tys. čałaviek hinuć i bolš za 4 tys. atrymlivajuć traŭmy. U Finlandyi, jakaja pierajšła na takija cyharety, kolkaść śmierciaŭ u vyniku pažaraŭ, vyklikanych niezatušanaj cyharetaj, źniziłasia na 43%.
