Siarhieja Kavalenku, jaki nie spyniaje haładoŭku pratestu suproć prysudu, mohuć pačać prymusova karmić. Tym časam hramadzki kamitet «Za volu» źviarnuŭsia da prezydenta Rasiei Dźmitryja Miadźviedzieva i premjera Ŭładzimiera Pucina z zaklikam paŭpłyvać na pazycyju Alaksandra Łukašenki adnosna Siarhieja Kavalenki.
16 sakavika maci haładoŭnika Lidzii Kavalency paviedamili ŭ administracyi izalatara na Vaładarskaha, što siońnia ž «zojmucca jaje synam, pačnuć jaho lačyć». Lidzija Kavalenka miarkuje, što havorka idzie pra prymusovaje charčavańnie syna. Jana hetaha apasajecca, bo, pavodle jaje, u turemnym špitali niedastatkova kvalifikavanyja daktary, a fizyčny stan jaje syna vielmi słaby:
«U jaho ž tolki kości dy skura, ciahlicaŭ pad skuraj amal nie zastałosia. Ci možna ž jaho ŭ takim stanie prymusova karmić? Jamu ž peŭna nie padydzie lačeńnie ŭ turemnym špitali, a tut abmiežavanaje lačeńnie. Jamu patrebnaja kvalifikavanaja medyčnaja dapamoha, jakuju tut zabiaśpiečyć nia mohuć».
Lidzija Kavalenka davodziła administracyi «Vaładarki», što jak maci čałavieka ŭ vielmi drennym stanie jana maje prava patrabavać terminovaj špitalizacyi syna, ale joj admovili. Jašče da abiedu Lidzija Kavalenka adniesła zajavu na špitalizacyju ŭ Departament vykanańnia pakarańniaŭ. «Papieru pryniali, ale rabić ničoha nie abiacajuć», — paźniej paviedamiła pra vyniki vizytu Lidzija Kavalenka.
16 sakavika hramadzki kamitet «Za volu» padrychtavaŭ i adpraviŭ zvarot na imia prezydenta Rasiei Dźmitryja Miadźviedzieva i premjera Ŭładzimiera Pucina z prośbaj zastupicca za Siarhieja Kavalenku pierad Alaksandram Łukašenkam.
«Hramadzkaść Biełarusi vielmi pieražyvaje za Siarhieja Kavalenku. Telehramy, skarhi, prašeńni i zvaroty ŭ Hieneralnuju prakuraturu, Departament vykanańnia pakarańniaŭ dy inšyja dziaržaŭnyja orhany z prośbaj nia być abyjakavymi, nia być udzielnikami zabojstva čałavieka, prośby ab dapamozie tysiač i tysiač biełarusaŭ nie dajuć nijakich vynikaŭ. Siarhiej pavolna hinie»,— patłumačyli aŭtary zvarotu toje, čamu jany źviartajucca za miežy svajoj krainy.
Siabra hramadzkaha kamitetu «Za volu» Hanna Šapućka kaža, što prykładam dla ich byli padziei 1996 hodu, kali paśpiachova skončyłasia haładoŭka biełaruskich apazycyjaneraŭ u toj ža «Vaładarcy»:
«Tady prezydent Rasiei Barys Jelcyn zaklikaŭ Łukašenku vyzvalić Viačasłava Siŭčyka i Juryja Chadyku, i ich žyćci byli ŭratavanyja. Tamu my vyrašyli źviarnucca da ciapierašnich kiraŭnikoŭ Rasiejskaj Federacyi z padobnaj prośbaj.
«Z 8 lutaha 2012 hodu Siarhiej znoŭ nie prymaje ježy, jon strašenna schudnieŭ, vielmi słaby, pry roście 182 santymetry jon važyć užo 51 kilahram, ź ciažkaściu ruchajecca. Darahaja kožnaja chvilina», — paviedamlajuć zajaŭniki.
Žonka haładoŭnika Siarhieja Kavalenki Alena kaža, što Siarhiej pačaŭ haładavać jašče 19 śniežnia minułaha hodu i pratrymaŭsia miesiac. Paśla hetaha jon pad ciskam administracyi Viciebskaha izalatara pačaŭ adzin raz na dzień prymać ježu, kab pastupova vyjści z haładoŭki. Tym časam milicyjanty źniali jaho na kameru i vykłali videa ŭ internet, zajaviŭšy, što Kavalenka padmanvaŭ ludziej, kali kazaŭ pra haładoŭku. Na znak pratestu z 8 lutaha Siarhiej adnaviŭ haładoŭku i ciapier nie sastupaje. Pavodle žonki Kavalenki, jon nia vieryć apošnim abiacańniam milicyjantaŭ pakłaści jaho ŭ špital, kali jon spynić haładoŭku.
«Učora na spatkańni jon užo nia moh navat siadzieć, kłaŭ hałavu na ruki, havaryŭ ledź čutna. Majho syna treba terminova kłaści ŭ špital pad nahlad daktaroŭ», — kaža maci viaźnia Lidzija Kavalenka.
Siarhiej Kavalenka asudžany na 2 hady i miesiac za parušeńnie ŭmovaŭ adbyćcia chatniaj chimii, jakuju jon atrymaŭ za vyviešvańnie bieł-čyrvona-biełaha ściaha na navahodniaj jołcy ŭ Viciebsku.
