Rajonnyja haziety paŭnočnaj Mahiloŭščyny — białynickaja «Zara nad Drućciu», kruhlanskaja «Sielskaja žyćcio» i škłoŭski «Udarny front» — nadrukavali pieradvybarčyja prahramy kandydataŭ u deputaty pałaty pradstaŭnikoŭ pa Škłoŭskaj vybarčaj akruzie № 90.
Pakazalna, što 8 vieraśnia kruhlanskaja i białynickaja rajonki źmiaścili pieradvybarčuju prahramu Ryhora Kastusiova i Partyi BNF «Abarona nacyjanalnych intaresaŭ harantyja paradku i dabrabytu na našaj biełaruskaj ziamli» z staražytnym biełaruskim hierbam «Pahonia». Škłoŭskaja rajonnaja hazieta «Udarny front» 5 vieraśnia «Pahoniu» pobač ź pieradvybarčaj prahramaj kandydata ŭ deputaty Ryhora Kastusiova nie źmiaściła.
" Ja śpiecyjalna prasiŭ redaktaraŭ usich rajonnych haziet, jakija vychodziać na terytoryi Škłoŭskaj vybarčaj akruhi № 90, źmiaścić pobač z majoj pieradvybarčaj prahramaj «Abarona nacyjanalnych intaresaŭ — harantyja paradku i dabrabytu na našaj biełaruskaj ziamli» vyjavu «Pahoni», — kaža Ryhor Kastusioŭ. — Navat kazaŭ, što heta možna zrabić, kali patrebna, za košt skaračeńnia tekstavaha materyjała. Ludziam patrebna nahadvać pra śviaščennyja biełaruskija simvały. Ja ŭdziačny redakcyjnym kalektyvam kruhlanskaha «Sielkaha žyćcia» i białynickaj «Zary nad Drućciu» za toje, što jany maju prośbu ŭličyli. Čamu dla «Pahoni» miesca nie chapiła ŭ škłoŭskaj rajonnaj haziecie «Udarny front», ja nie viedaju. Niachaj heta zastaniecca na ich sumleńni».