Dy-džej Adradžeńnia: druhi vypusk
Dzień 1 červienia staŭ vypusknym dla 12 novych Dy-džejaŭ Adradžeńnia, padrychtavanych na firmovych maładafrontaŭskich seminarach na praciahu troch viesnavych miesiacaŭ. Na ŭračystym schodzie MF razam z uručeńniem imiannych sertyfikataŭ i pryzoŭ adbyłosia j pakazalnaje šoŭ "duchovaha specnazu".
Prahrama seminaraŭ ułučała admysłovyja testavańni Dy-džejaŭ, asnovy systemnaje pracy pa ŭsim spektry intaresaŭ moładzi, azy indyvidualnaje j masavaje psychalohii, technalohii šoŭ i public relations, tele- j radyjoefekty. Seminarystam daviałosia prajści praź niaspynny interaktyŭny treninh, mazhavyja šturmy j vyprabavańni ŭ žyvoj aŭdytoryi – kožny ź ich musiŭ arhanizavać i pravieści dyskateku j Šoŭ Biełaruščyny, a taksama vystupić pierad poŭnaj zalaj z padrychtavanaj pramovaj. Zrešty, hałoŭny fokus kursaŭ zaklučaŭsia navat nie ŭ technalahičnaj padrychtoŭcy: zadačaj Dy-džejaŭ Adradžeńnia jość pašyreńnie nacyjanalnaj idei, spałučeńnie biełaruskaje formy z duchovym, chryścijanskim źmiestam.
12 pieramožcaŭ kursaŭ vyznačanyja pavodle asabistaha rejtynhu. Darečy, treba nahadać, što pieršy vypusk Dy-džejaŭ, što adbyŭsia hod tamu, akazaŭsia nadzvyčaj paśpiachovym: pałova ź ich stali siabrami Ŭpravy MF, niekalki čałaviek uznačalili hramadzkija abjadnańni j zrabilisia žurnalistami, siarod ich i Mis MF-99.
U siońniašnim desancie perspektyŭnych chłopcaŭ i dziaŭčat, napeŭna, nia mienš. Lideram kursaŭ stalisia 17-hadovaja Volha Daniševič – kiraŭnica maładafrontaŭskaje pres-słužby j 20-hadovy student jurfaku BDU Siaržuk Lisičonak, jaki da hetaha 6 hadoŭ (!) zajmaŭsia praktyčnaj psychalohijaj. Siarod vypusknikoŭ – 15-hadovy liceist Siaržuk Chadarkievič, WEB-dyzajner Andruś Bandarovič, pieramožca respublikanskaj alimpijady pa historyi Pavał Kosmač, šachmatyst Andruś Dzienisievič. Lišnie kazać, što kožny z Dy-džejaŭ vałodaje kamputaram, adnoj-dvuma zamiežnymi movami, zajmajecca asabistaj tvorčaściu, i, naturalna, chutkastrelna razmaŭlaje pa-biełarusku.
Aproč Dy-džejskich kursaŭ u ramkach maładafrontaŭskaje inicyjatyvy "Maładoje Adradžeńnie" ŭ mienskich škołach i vučelniach prachodziać šmatlikija viktaryny j brejn-rynhi, dyskateki j kancerty.
Pres-słužba Maładoha Frontu
